هل حقاً مر دستور فرنسا ب-٥٣٪ فقط ؟

في ناس بتقول إن المعارضه بتبالغ لما بتتكلم عن التوافق، الناس دي بتستشهد بموضوع إن "دستور فرنسا بعد الثوره" تم قبوله ب- 53٪ بس، و هي معلومه لغوياً صحيحه، بس أنا كمعارض عايز أحكي قصة عن الثورة الفرنسيه. 

 الثورة الفرنسيه كانت من أكثر من ٢٠٠ سنة، و في خلال ال-٢٠٠ سنه دول إتكتب ١٧ دستور، من ١٧٩١ لحد ١٨٠٤ بس إتكتب 7 دساتير و حدث كذا إنقلاب، و الناس كانت بتقتل في بعضها! فأنهي دستور من ال-١٧ انتو بتتكلمو عليه؟

 بتتكلموا عن الدستور اللي إتكتب في ١٩٤٦؟  هو فعلاً شديد الشبه بالدستور اللي بيتكتب دلوقتي في مصر، عندكم حق،  كان فيه إنقسام شديد، و كان الحزب الحاكم يريد تمريره، و كان فيه نسبة معارضه كبيره، تزعمها ( شارل دي جول ) و رفض أن يصدر الدستور بهذا الإنقسام.

لكن رغم المعارضه، دفع الحزب الحاكم بالدستور للاستفتاء، و مر ب ٥٣ ٪ نسبة قبول بنسبة حضور ٣١٪ من الناخبين ( بالظبط زي الجوله الأولي في مصر )

لكن اللي هيكلف نفسه و يكمل قرايه القصه، هيعرف إن طريقة إصدار دستور ١٩٤٦ وضعت فرنسا في حاله من عدم الإستقرار و الفوضي و الفشل السياسي استمرت ١١ عام، فشل خلالها ١٠ حكومات في تحقيق الإستقرار، حتى جاء شارل دي جول في عام  ١٩٥٨ (المعارض لدستور ١٩٤٦)، و أعلن سقوط هذا الدستور الفاشل، و قرر إستفتاء فرنسا على دستور جديديحظي بالتوافق و يحافظ على الاستقرار عن طريق مد فترة الرئيس الي 7 اعوام.  تم قبول إقتراح دي جول في إستفتاء عام في فرنسا بنسبة تزيد عن ٨٠٪، و كان هذا دستور الجمهوريه الخامسه مصدر شرف كل فرنسي من ١٩٥٨ لحد النهرده، و ممكن تسأل أي حد فرنسي عن مدي إعتزازه بدي جول.  

- سؤالي الأخير،  كام جمهوريه عايزين تعملوها في مصر و كام دستور حتي نحصل علي الاستقرار و التقدم...!!

http://en.wikipedia.org/wiki/Constitution_of_France
http://en.wikipedia.org/wiki/French_Constitution_of_1946
http://en.wikipedia.org/wiki/French_Constitution_of_1958